2009/12/21

Solstitio, le retorno del sol


Hodie es le solstitio hibernal. Le nocte le plus longe del anno. E le die le plus curte. Bon Solstitio a totes!

Le blog Interlingua Roma presenta le historia e tradition de iste momento importante. E ecce mi entrata del solstitio de quatro annos retro.

2009/12/19

Nive


In le tempore del calefaction global, Bergen non plus es coperite per nive tote le hiberno. Le photo se data del 27 de martio de 2008 - ma anque hodie le nive ha cadite. Le citate se prepara pro un Natal blanc.

2009/10/27

Banditos a ski


Le film mute, "Schneeschuhbanditen" ("Banditos a ski"), era presentate a un grande publico in le station ferroviari de Bergen. Il se tracta de un co-production norvego-german de 1928. Le titulo norvegian, "Bergenstoget plyndret inatt", se traduce "Le traino a Bergen era robate iste nocte". In le rolos principal (e sur le schermo): Aud Egede-Nissen (nascite in Bergen) e Paul Richter (de Austria), stellas del cinema german del annos 20.

IMDb: Banditos a ski.

2009/10/11

Libertate e independentia


Tallinn. Le Monumento del Guerra de Independentia. Le Placia del Libertate. Le Ecclesia de Sancte Johannes.

2009/10/03

A Rio le Jocos Olympic, a qui le Premio Nobel de Litteratura?

Es le tempore del grande annunciamentos. Le Jocos Olympic de 2016 ha essite assignate a Rio de Janeiro, malgrado le presentia del Obamas (o pote esser justemente a causa de lor show un poco exaggerate). Al incontro del Comitato Olympic International, in Copenhagen, non solmente le citate del presidente nord-american, Chicago, ma anque Madrid e Tokyo debeva resignar ante le candidatura del ancian capital del pais de Pelé, del presidente Lula, de Villa-Lobos, de Alberto Santos-Dumont, de João Carlos de Oliveira, de Patrícia Pillar e de Paulo Coelho. Certemente un decision sage.

Le 8 de octobre, le jovedi veniente, le plus tosto a 13 h tempore svedese, le Academia Regal de Svedia va annunciar le vincitor del Premio Nobel le plus interessante, lo del litteratura. Le anno passate le francese, J. M. G. Le Clézio, recipeva le premio. Cata secunde anno io repete, probabilemente in van, le candidatura de Harry Mulisch, le alchimista del litteratura nederlandese. Ben, Mulisch ha plus que 80 annos e non ha publicate un libro post 2001. Pote esser que ille nunquam recipe le Premio Nobel. Al svedeses de decider.

Naturalmente existe altere candidatos, forsan mesmo un norvegiano: Jon Fosse, le dramaturgo enigmatic, ja jocate plus frequentemente que Ibsen in le theatros le plus importante del mundo. Ma Fosse ha solmente 50 annos. Ille ancora es un homine del futuro. Intertanto nos attende le prime vincitor del lingua nederlandese (naturalmente non conta le premio del conte Maeterlinck. Su lingua materne certemente era le nederlandese, ma ille scribeva in le francese, secundo le vetule tradition belge. Maurice Maeterlinck recipeva le Premio Nobel de Litteratura in 1911, presque cent annos retro.)

E le alternativas? Pote esser un brasiliano. E proque non?

2009/09/22

Esperanto es rege, al minus inter le cavalleros del wikipedias

Il ha plus que tres (ma minus que quatro) menses que io prediceva que le wikipedia del lingua Esperanto surmontarea lo del Volapük exactemente le 1 de octobre. Ben, observa attentivemente le duo wikis: Ja hodie Esperanto es a 118.786, durante que le cifapad del Vükiped, evidentemente stagnate, monstra 118.782. Dunque, io me trompava, io lo admitte, ma solmente per novem dies! Al mesme tempore le wikipedia de interlingua es a 4.873 articulos.

2009/08/12

... von Sydow, un klingon?

Non del toto. Il ha alicun septimanas, io poneva un question innocente al lectores: "Max von Sydow, le actor famose, es le filio de ..." - con le sequente alternativas plus o minus realistic: un volapükista, un idista, un esperantista, un occidentalista, un novialista, un interlinguista, un klingon.

Cosa interessante, 83 % del lectores respondeva ... "un klingon" (!). 16 % pensava que ille es le filio de un esperantista.

Max Carl Adolf von Sydow (nascite in 1929), le actor e cineasta franco-svedese - cognoscite de films tanto differente como le Septime Sigillo, le Exorcista, Pelle le Conquerator, Flash Gordon, Hannah e su Sorores, le Chronicas del juvene Indiana Jones, Hamsun, le Delegatos - es le filio del professor Carl Wilhelm von Sydow e del baronessa Greta Rappe.

Carl Wilhelm von Sydow (1878-1952), le patre de Max, era un ethnologo svedese. Ille era un membro distinguite del movimento idista de Svedia in le 1920s. Postea ille deveniva occidentalista.

Regrettabilemente io non ha plus de informationes super le activitates interlinguistic de von Sydow. Pote esser que le lectores, non plus pensante que le question serea un burla, pote contribuer con plus de detalios.



Le pictura: C.W. von Sydow in action. (Photo de 1922, fonte: wikipedia svedese.)

2009/07/13

Trainos legier


Construction del nove linea de trainos legier. A dextre le station del trainos ordinari.

2009/07/03

30 grados


30 grados, sur le bureau de un de mi collegas. Felicemente (ancora) non es 47 grados.

2009/06/30

Twitter, qui pipa in interlingua?

In 1979, quando le ayatollah Khomeini preparava su retorno a Iran, ille inviava su messages sur cassettas de musica, que era secretemente copiate. Recentemente, durante le turbulentias del electiones iranian, furorava le uso de Twitter. Bon o mal, le mundo se cambia.

Twitter es un servicio de micro-blogging in su forma le plus extreme: per messages ("tweets") de un maximo de 140 litteras, on presenta su opiniones, informationes, observationes, propone ligamines (sovente abbreviate per bit.ly o tr.im), face demandas o responde a (o reposta) altere tweets. Es un medio ultra-rapide, ma anque non poco enoiose. ("Twitter", in anglese, es le sono que face le aves. "Pipo" in interlingua? Ma forsan existe un traduction melior.)

Le esperantistas naturalmente ja ha discoperite le nove medio, ma le campo interlinguista ancora es un poco silente.

Seque mi pipos a @mosvends. Usque ora io ha pipate, al hasardo, in interlingua, esperanto, volapük, anglese o norvegiano, ma si mille interlinguistas me "seque", io naturalmente va pipar exclusivemente in interlingua.

2009/06/25

Bill Clinton, le Cantico del Rubino Rubie, e le McCarthyismo del litteratura norvegian

Hodie un visitator de Schaumburg, Illinois, Statos Unite ha discargate 14 vices le entrata Bill Clinton a Bergen post haber cercate le parola "porcos" + un altere parola que comencia per le mesme tres litteras. Io non sape proque le nord-americanos cerca tal parolas.

Duo annos retro io prophetisava que Bill Clinton sera le sposo del futur presidente nord-american. Ben, le cosas se ha disveloppate in un altere maniera. Evidentemente sr Clinton non es le sposo del presidente Obama.

Io suppone que le visitator de Schaumburg se interesava del commentarios - in total 18 commentarios, alicunes concernente un certe libro del litteratura national norvegian: "Le Cantico del Rubino Rubie" (1956) per Agnar Mykle. Io non plus memora qui ha scribite le diverse commentarios e qui se cela detra le multe pseudonymos.

Del resto, Clinton non portava con se le saxophono.

2009/06/24

Victoria final de interlingua, le lectores ha parlate

Le fina venko ("victoria final") naturalmente es un concepto del cultura esperantista - le die quando esperanto ha superate tote su rivales. Ma iste vice le resultato es differente. "In que lingua tu desidera iste blog?" Post un referendum aperte e super toto multo democratic, ecce le votos:
Interlingua 41 %
Esperanto 12 %
Volapük 12 %
Occidental/Interlingue 12 %
Norvegiano 8 %
Ido 8 %
De Alltunge 4 %

Forsan es un parve deception que interlingua non ha superate le limite magic de 50 % (o mesmo 67 % - le majoritate absolute). Ma 41 % naturalmente es un resultato exceptionalmente bon. Me gaude anque le facto que 4 % del population mundial supporta le uso del Alltunge.

2009/06/23

Interforo officialmente inaugurate al solstitio, interlingua entra le nove millennio

Le dies del listas yahoo etc es finite. Le 21 de junio, interforo era inaugurate - iste foro moderne es create, durante multissime horas nocturne, per le danese dynamic, Lars Falcatorrosa Rosenmeier. Un labor multo laudabile! Visita le foro a interforo.org. Ben, si tu non confide in mi recommendation, lege primo lo de Daniel Hollande.

Hodie es le vespere de Sancte Johannes. Proque io non ha scribite un nove epistolo, io ha retrovate mi entrata de tres annos retro, con belle pictura per Nikolai Astrup - e un discussion que revocava vetule traditiones pan-europee: juvenas nude qui saltava le foco al medienocte etc.

2009/06/20

A


"A", le nove yacht del russo Andrey Melnitchenko, visita Bergen. Le nave costa plus que 200.000.000 euros. (Eh, io pensa que isto es le numero correcte de zeros ...)

2009/06/12

Electiones de Iran

Hodie, le 12 de junio, trova loco le electiones presidential del Republica Islamic de Iran. Secundo un prognosis Mir-Hossein Mousavi, le ex-prime ministro reformista, ha 60 % del votos - e le presidente conservative, Mahmoud Ahmadinejad, anque 60 %. Isto forsan es un poco inquietante. Le duo altere del quatro candidates approbate per le Consilio del Guardianos es le reformista Mehdi Karroubi e Mohsen Rezaee, un conservative.

Iran es un ancian pais, con traditiones ric e longe, partialmente comprendite per le mundo exterior - e partialmente non. In le Occidente nos naturalmente non mesmo sape como pronunciar correctemente le nomine de Mahmoud Ahmadinejad, le presidente. Le resultatos definitive del electiones es expectate deman, sabbato.

Vide anque:
PageF30: Postas de Twitter del electiones iranian
The Frame (blog de photos del Sacramento Bee): Imagines del electiones iranian

2009/06/08

Conlanging, un vitio non (plus) tanto secrete

Le construction de linguas ("conlanging") pote esser un obsession - e un "vitio secrete" (le parolas de J. R. R. Tolkien, "le Shakespeare del conlangers").

Pro illos qui (ancora) comprende le lingua anglese: Conlanging: The Not-So-Secret Vice, articulo inspiratori per Diana Reed Slattery. ("Combatta extinction linguistic - inventa un lingua!")

(Io trovava le referentia al articulo a Twitter.)

2009/06/07

In Maastricht, un libreria celeste


Le libreria del catena Selexys in le vetule ecclesia dominican de Maastricht, Nederland. Le ecclesia gothic data del fin del 13-tie seculo. Le jornal britannic, The Guardian, lo characterisa como un libreria construite in le celo.

Ancora alicun photos del ecclesia/libreria.

2009/06/06

Gent


Tram ante le entrata de Gravensteen, le castello del ancian contes flaminge, a Gent.

2009/06/05

Le photos innocente del prime ministro Berlusconi

Como le prime blog in interlingua nos da le ligamine al jornal espaniol, El País, que ha publicate un serie de photos del prime ministro italian in le compania de alicun personas non completemente vestite. Secundo Berlusconi le publication es "un agression al intimitate". Le prime ministro tamen mantene que le photos de su festas es completemente innocente: "Quando on ha vidite un persona qui se ducha con frac e cravata?"

Secundo le jornal svedese, Svenska Dagbladet, un del photos monstra duo juvenas prendente le sol a sinos nude, con calceones tanto minuscule que illas es practicamente nude. Anque le ex-prime ministro chec, Topolanek, ha confessate que ille es un del personas depingite.

Un pipator britannic se lamenta: "Proque le scandalos del politicos britannic non es de iste sorta?"

Nive


Nive. Estate, tu dice? Contribution al zona de Photos Urban in Blanc e Nigre del rete social Origo.no. Le photo es facite in Tallinn.

2009/06/03

Wikipedias: Esperanto tosto plus grande que Volapük

Non, isto non es novas retardate del anno 1891. Il se tracta (de nove) del wikipedias in linguas auxiliar, e lor numero de articulos. E como sempre, quantitate es rege.

Al momento, ecce le lista del wikipedias (le 3 de junio 2009):

Volapük, con 118.774 articulos.
Esperanto, 114.465.
Ido, 17.076.
Interlingua, 4.708.
Novial, 2.545.
Occidental/Interlingue, 1.322.
Lojban, 887.

Nos naturalmente sape como Volapük ha conquerite su position. Ma cosas evidentemente ha cambiate: Si nos compara le lista con illo del 20 de augusto de 2008, nos constata que le numero de articulos in le wiki esperantista se augmenta con 40 cata die, durante que le volapükistas al momento produce solmente 4 articulos diurnemente. Isto significa que Esperanto surmontara Volapük le 1 de octobre de 2009 ...

Si le tendentia continua, al initio del anno 2010 nos va haber le sequente lista:

Esperanto, 123.022 articulos.
Volapük, 119.694
Ido, 17.972
Interlingua, 5.022
Novial, 2.626
Occidental/Interlingue, 1.458
Lojban, 1.036

Le wiki de Novial al momento es illo con le crescimento le plus modeste, un articulo nove cata tertie die. Novial era create per le famose linguista danese, Otto Jespersen.

2009/06/02

900 annos, 900 linguas, 45 minutas

Elvish, Klingon, Esperanto. In le show On Point, del station anglo-phone WBUR de Boston (Statos Unite), Tom Ashbrook parla con Arika Okrent, qui justo publicava le libro "In the Land of Invented Languages". Linguas artificial naturalmente es un thema fascinante, super le qual on pote parlar durante 45 minutas sin mesmo mentionar le nomine de interlingua. Durante le ultime 900 annos, "soniatores, visionarios e homines folle" ha create non minus que 900 linguas. Proque? E proque nulle lingua artificial vermente ha conquerite le mundo? Arika Okrent, fascinate per le thema, tamen da responsas realistic.

On pote ascoltar le show al sito del WBUR, o discargar lo como podcast. Ecce le sito del libro.

2009/06/01

Pentecoste in le vetule Cathedral


Servicio ecumenic in le ruinas de Kristkirken ("le Ecclesia de Christo"). Le vetule cathedral de Bergen era demolite in 1531 pro rationes non completemente clar.

A alicun passos, on prepara le concerto del Eagles.

2009/05/30

Novas de tote le mundo

In le columna a dextra io ha addite un nove elemento con novas de tote le mundo, si non in interlingua al minus ja in tote su linguas de controllo - e in le omnipresente linguas scandinave.

Al momento on trova novas constantemente actualisate de jornales como El Mundo, Hürriyet, Ekstrabladet, O Globo, Bergensavisen, AllAfrica, de Volkskrant, Gazeta.ru, Eesti Ekspress, Modern Ghana etc.

Le scopo modeste es colliger jornales e altere fontes de novas de tote paises del mundo. Proque non anque in tote le linguas del mundo? Ben, felicemente ancora existe tante linguas que isto serea un carga troppo extense.

2009/05/07

Kiöpo binom bötädöp? Le quatro phrases essential que tote viagiatores debe cognoscer

Le estate es le tempore del viages, del nove amores e amicitates, ma anque del situationes plus delicate, si non periculose. Al sito travelphrases.info, David McCreedy ha colligite le quatro phrases essential, que cata viagiator deberea cognoscer in si multe linguas possibile, traducite in "451 linguas, 259 dialectos e 63 conlangs".

Ecce le quatro phrases essential:

1) Ubi es mi camera?
2) Ubi es le plagia?
3) Ubi es le bar?
4) Non me tocca illac!

(David McCreedy mantene que le ultime phrase evidentemente es le plus importante, "specialmente si on ja ha recipite responsa al prime tres".)

Le traductiones in le 63 linguas artifical include le Ceqli ("goza cam sta kwadjay?"), le Láadan ("Báa sheshihoth bebáaha?"), le Esperanto ("kie estas la drinkejo?") e le Lojban (".oi ko na pencu mi fo ta").

Ecce le traduction del quatro phrases essential in linguas artifical ("conlangs")

Kiöpo binom bötädöp? es le traduction del tertie phrase, in le volapük.

2009/04/19

Le statua de Amalie Skram



Amalie Skram era un autor norvegian, cognoscite pro stilo naturalistic e puncto de vista feministic. Illa nasceva in Bergen in 1846 e moriva in Copenhagen in 1905.

Wikipedia espaniol: Amalie Skram

2009/04/11

Le Universitate de Tartu


Le Universitate de Tartu era fundate in 1632. A dextera, le edificio principal. Le pictura al muro es basate sur un lithographia del anno 1860.

2009/04/06

Le plagia de Pirita


Le plagia de Pirita, in marte. In le distantia on vide le centro de Tallinn.

2009/04/04

Blogs in ido, renascimento del lingua de Couturat & de Beaufront?

Construite per Louis Couturat e propagandate per Louis de Beaufront, ido es un lingua artificial con nomine curte e historia longe. In 2007 le lingua celebrava su centenario.

In le passato, le poc tentativas de blogar in ido ha essite de duration curte. Recentemente tamen, le blogosphera ha deventite un poco plus stabile. Visita le blogs in ido:

Prilingua letraro, de Tiberio Madonna.
Royalist-Ido, Francia.
Ido Estonia, de Anvarzhon Zhurajev, Tallinn, Estonia.
Ido-poezio, de Tiberio Madonna.
Haiku IDO, de Antonio M.

Ben, in qual lingua le blogs al momento es plus active - in ido o in interlingua?

2009/02/20

Revitalisation de interlingua in le tempore del crise

Nos vive in un tempore de crises (del climate, del economia, e del movimento de interlingua). Harleigh Kyson Jr, in su blog Interlingua multilingue, cita un lista de notas per le interlinguista svedese, Jan Årmann, sub le rubrica: Interlingua ha besonio de revitalisation.

Jan Årmann nota i.a.:

(4) Le UMI non seque su statutos e le Consilieros General non ha habite alcun reunion.

(6) Le foro INTERLNG es technicamente obsolete e sembla esser un vetule TELEX. Il non es possibile inserer illustrationes o adder attachamentos. Le traffico ibi es de pauc interesse.

(9) Sin personas active e interessate – nulle actiones possibile! Sin personas competente a gerer nulle resultatos. UMI con su nove statutos sembla ignorar su cargas. Isto face necessari ager.

(11) Qui o quales es autorisate a organisar e proponer un “reformation” del movimento pro Interlingua?

Luther, con su 95 theseses, reformava le ecclesia. Al movimento de interlingua reformation o solmente indulgentia interlinguistic?

2009/02/11

Retorno del professor Egil "Drillo" Olsen: Norvegia-Germania 1-0

Post un absentia de dece annos, le professor Egil "Drillo" Olsen de nove es le gerente del equipa national Norvegian de football. Le resultatos positive naturalmente non se tardava: iste vespere, in Düsseldorf, le Germanos era battite per 1 contra 0. Christian Grindheim faceva le goal post un attacco perfecte.

Cosa estranie, isto es solmente le quarte victoria Norvegian contra un equipa national German:

In 1979, in le qualificationes pro le Olympicos de Moscova, le West-Germanos era battite duo vices (2-0 in Trondheim e 1-0 in Baunatal. Postea ambe paises boycottava le Jocos de Moscova, dunque duo matches un poco inutile. Del resto, Norvegia nunquam succedeva a batter le Republica Democratic German ...)

Le victoria le plus famose contra Germania naturalmente es lo del Olympicos de Berlin, in 1936, con sr H. sur le tribuna. Norvegia batteva le equipa German per 2-0, con duo goals per Magnar Isaksen. (Secundo le legenda, sr H. abandonava le stadion post le secunde goal, 8 minutas ante le fin del match. Postea, ille nunquam visitava un match de football.)

In le fin del millennio passate, sub le commando del professor Olsen, Norvegia era le numero 2 sur le statistica del FIFA. (Brasil era le numero 1. Ma, como on sape, le Brasilianos era battite per 2-1 in le Cuppa Mundial de 1998.) Durante le ultime dece annos, le professor Olsen i.a. ha essite le trainer del equipa national Irakian.

Al momento Norvegia es numero 56 sur le lista del FIFA. (Germania es le numero 2.) Isto naturalmente tosta va cambiar: In 2010, Africa del Sud sera le hospite del Cuppa del Mundo ... Nelson Mandela, here we come ...!

2009/02/06

Vita de Brian non de nove prohibite in Norvegia ... qual damno!

Le commission de sanitate del provincia west-norvegian de Møre og Romsdal ha reprochate un obstetrice qui criticava un femina parente post que illa blasphemava durante le parturition. Christianos del provincia ha defendate ... le obstetrice.

Al mesme tempore, in le andedam politic del capital Oslo: le Partito Centrista, le parte le minus significante del governamento Stoltenberg, ha proponite le abolition del vetule prohibition contra blasphemia (un paragrapho dormante) ... e le inclussion de iste prohibition in le lege anti-rasista (non dormante). Le prime ministo non comprendeva le logico de iste manoeuvre - e le gerente del Partito Centrista debeva recognoscer su errores de pensamento.

Isto (probabilemente) significa que nos ancora pote leger le discurso famose de Arnulf Øverland, "Christianismo, le decime plaga" (accusate pro blasphemia in 1933) - e reguardar le film britannic, "Vita de Brian" (prohibite in Norvegia de 1980 a 1986 ... "tanto amusante que illo es prohibite in Norvegia!").

"Gentes appellate le politicos, illos vade le casa! Repete cent vices!"

2009/02/03

Tallinn in le dies de Edgar de Wahl



Iste vetule photo es categorisate como "Vista general - Reval, Russia". Hodie on dicerea: "Citate Vetule - Tallinn, Estonia." Le photo data del annos 1890.

Personas qui ha visitate Tallinn, tosto recognosce le citate: Le silhouette characteristic del Vanalinn, le citate vetule con su turres e le collina del cathedral, non ha cambiate radicalmente durante le ultime cent annos. Ancora hodie le lineas in le fronte del photo es usate per le trams. A dextere on probabilemente vide le prime Station Baltic (Balti Jaam), construite in 1870.

Isto es le citate de Edgar de Wahl! Le creator de Occidental-Interlingue habitava Tallinn (o Reval) durante le major parte de su vita. Ille nasceva in 1867 e moriva in 1948.

Tallinn certo vale un visita - un suggestion pro le adherrentes del linguas artificial: le conferentia international del lingua Ido trova loco in Tallinn del 17 al 22 de julio 2009.

2009/01/22

Radio danese: Qui inventava Interlingua?

In Spørgehjørnet, "Le angulo de questiones", programma popular del Radio Danese, Carsten Wiedemann cata septimana responde a demandas de tote themas imaginabile (con le sol exception de cosas politic o gastronomic).

Hodie on presentava le responsa a un del questiones le plus fundamental del societate moderne: "Qui inventava le lingua artificial Interlingua?"

Wiedemann brevemente tractava le principios del linguas artificial, le successo e declino del volapük - e finalmente alicun del avantages de Interlingua (vocabulario international, grammatica regular etc), e le publication del duo libros basic in 1951. Interlingua era presentate como un alternativa de Esperanto.

In le transmission on non exaggerava le possibilitates futur del linguas artificial, indicante le anglese como le melior instrumento del communication international. Wiedemann mentionava le adresse del sito del Union Danese pro Interlingua - e con su voce sonor e sympathic, legeva alicun phrases in interlingua.

On pote ascoltar le programma in-linea o abonar se al podcast. Ecce le pagina del transmission hodierne.


Summario in Norvegiano:
"Hvem oppfant det kunstige språket interlingua?"
Spørgehjørnet, Danmarks Radios ukentlige program for spørsmål om alt mellom himmel og jord (unntatt politikk og matlaging) svarer på dette og andre spørsmål i dagens utsendelse. Programmet kan høres som nettradio og som podcast.

2009/01/18

Photos del epocha de volapük


Le Bibliotheca del Congresso (Washington, Statos Unite) ha digitalisate e publicate un grande collection de photos ab le periodo de 1890 a 1910. Un grande parte es in colores - s.n. photochromia. Le photos, in total presque 6000, monstra urbes e paisages rural de Europa, le Oriente Medie e America del Nord. Un ver fonte pro illos qui se interessa del passate!

In le photo: un del cinque photos de Bergen - un panorama del porto. A sinistre, le area hanseatic. Io suppone que le photo se data de inter 1897 (quando on introduceva le tram - le linias es clarmente visibile) e 1899 (quando on demoliva un parte del area hanseatic).

On pote explorar le collection al sito del Bibliotheca del Congresso. Un parte del collection (i.a. le photos de Scandinavia) anque es publicate a Flickr.

Le zona Fotomuseum (museo de photos de Bergen), al rete social Origo, presenta le cinque photos de Bergen, e un docena de photos ab le provincia Hordaland.

Me surprende vermente le qualitate de iste photos ... facite in un tempore quando on ancora parlava le volapük!

2009/01/06

Amy non a Bergen, non a America

Le pressa norvegian reporta que le artista Amy Winehouse non veni a Bergen le 12 de januario. Isto significa que illa finalmente ha acceptate le mulcta de 4000 coronas. Isto probabilemente anque significa que le americanos la refusa visa al Statos Unite.

Al mesme tempore, le pressa danese presenta gallerias con fotos de Amy sur le plagia, a sinos nude. Ignominose!

2009/01/01

Amy Winehouse retorna a Bergen le 12 de januario

Le policia britannic ha citate juridicamente le artista Amy Winehouse. Secundo de jornal norvegian, BA, isto significa que le stella del pop debe apparer in le Palacio de Justitia le 12 de januario.

Winehouse ha appellate contra un mulcta de 4000 coronas norvegian pro possession de amphetamina.

Le blog anque in le passate ha tractate le caso Winehouse.

Un bon anno nove a tote le lectores de iste blog, a sra Winehouse - e a tote istos qui veni in contacto con le systema juridic de Norvegia durante le nove anno!