2008/12/01

Finalmente, un blogroll functionante, ma ...

Le lectores fidel de iste blog forsan memora que io, in un passate multo remote, ha facite alicun effortios pro crear un blogroll que lista le blogs secundo le dato del ultime actualisation. Le tentativos finiva proque le systema simplemente ignorava le medietate del blogs ...

Ben, problema solvite: Blogger ha includite un function que produce justo iste lista! E illo functiona! Vide columna a dextra ...

Ma ubi es le blogs in interlingua? Ora es le momento de demonstrar que le blogs in interlingua pote esser actualisate plus sovente que le blogs in esperanto, eulingu e lojban, nonne?

2008/11/28

Le germano con un accento klingon

Pro le lectores del lingua german: Spiegel Online, le equivalente german del magazin Panorama, ha publicate un articulo sur le "linguas artificial": nuqDaq 'oH puchpa''e' ?.

Le autor, Ariane Stürmer, schizza le historia del linguas artificial con le accento sur linguas como volapük, esperanto, loglan e klingon. Interlingua naturalmente es mentionate - como un del multe fiascos interlinguistic. Le articulo include 15 illustrationes de diverse linguas, e un comparation del patrenostre in 11 linguas.

"nuqDaq 'oH puchpa''e' ?" - le rubrica del articulo - es presentate como le prime phrase besonate per klingones qui visita le Terra. In germano: "Wo ist das Klo?" Ben, io pensava que visitatores cortese primo dicerea nuqneH ...

2008/11/02

Quatro annos retro: Theo van Gogh assassinate

Le 2 de novembre de 2004, le cineasta e columnista Theo van Gogh era assassinate in Amsterdam. Ecce mi posta de tres annos retro, al anniversario del homicidio brutal.

Intertanto, Mohammed B. ha essite condemnate al prision a vita.

Ayaan Hirsi Ali, con le qual van Gogh faceva le film fatal, "Submission", se ha displaciate al Statos Unite, proque le stato nederlandese non plus poteva garantir su securitate.

Ante su morte, van Gogh intendeva facer remakes american de alicun de su films. Un de iste projectos era realisate in 2007 quando Intervista, con Steve Buscemi e Sienna Miller, finalmente era presentate al publico.

PS. Como homage a van Gogh, io rereguarda "06/05" (con Tara Elders e Thijs Römer), le film del attentato al politico nederlandese, Pim Fortuyn, le 6 de mayo de 2002. (Le première trovava loco in decembre de 2004, post le morte de su creator.) Sur le disco de bonus: duo intervistas de van Gogh con Fortuyn. Un batalio de intelectos, lor armas: le parolas.

2008/10/18

Varg Veum


Statua del detective bergense, Varg Veum, protagonista del romanos del autor Gunnar Staalesen. Le statua, create per Vidar Bratlund Mæland, era inaugurate al die del première del film "Canes interrate", le sexte e ultime in le serie del films basate sur le romanos, con Trond Espen Seim como le detective famose.

2008/09/27

Un futuro digital

Le 1 de octobre on terminara le emission de television per signales analoge in Hordaland (e in le altere provincias in le quales on non ja ha terminate iste signales): Le futuro es digital. Le tempore que io quotidianemente usa ante le television non es grande. Dunque, le demanda fundamental era: esque io va continuar a haber accesso al television?

Certo, me mancarea le Tele-Texto, que io trova un excellente fonte de novas. Finalmente, isto era un del factores le plus determinante.

Ben, hodie io ha cumprate le parve decodificator nigre, un cassetta del marca Grundig, que alora me permitte le reception de television digital ...

Evidentemente, isto significa un cambiamento del assortimento de canales. De tempore in tempore me mancara le emissiones de Eurosport, non includite in le nove assortimento. Al altere latere, subito io ha 20 canales in vice de 7. Inter le canales on trova diverse canales del cultura commercial popular - ma anque canales plus interessante, como Discoperta, Geographia National e le Novas Mundial del BBC. E, naturalmente, tote le canales del NRK (radio & television), includite le Sámi-Radio.

E le Tele-Texto? Io ancora ha accesso al vetule Tele-Texto. E, in addition: le nove Tele-Texto Digital del NRK, con television sur un quarto del schermo, e novas e informationes sur le resto. Me place al prime vista. Ben, pro me le futuro evidentemente ancora es televisuel ...

2008/09/08

Dominica, in le station


Station ferroviari de Bergen.

America vota ... le mundo reguarda

Existe personas, probabilemente mesmo inter le multe lectores de iste blog, qui ancora non sape que le statouniteses tosto electera un nove presidente. Existe naturalmente anque personas qui crede que le presidente del Statos Unite ancora se nomina Jed Bartlet. Ben, io va rumper le illusion: le presidente nord-american es George W. Bush, le vacchero de Texas. Ma, felicemente ... in novembre le americanos electera un nove presidente, etc.

Prediction:

John S. McCain / Sarah Palin, 52.68 %
Barack Obama / Joe Biden, 41.04 %


Dunque, non le prime femina presidente (senator Clinton ja de longe es evicite del casa blanc de Granfratre). Non le prime afro-americano (senator Obama probabilemente es un homine del futuro, ma io time que non de un futuro tanto vicin.) Evidentemente, on electera le presidente le plus vetule del historia (ben, nulle problema) e le prime presidente statounitese qui non nasceva in le Statos Unite (lo que officialmente non es possibile secundo le leges del SUA. Si, es ver ... senator McCain nasceva in Panama). Un presidente estranie? Nulle problema.

Ma ... un presidente republican? Isto naturalmente sera un problema.

E, finalmente ... non oblida contar le votas! Memora que era le cultura chaotic del systema electorial que preparava le via al potentia de George W. Bush ...

2008/08/29

Blogs in Interlingua actualisate durante le estate de 2008

Lista de blogs in Interlingua, actualisate durante le periodo de maio a augusto de 2008:

Falcatorrosa / Lars Rosenmeier (Danmark)
Le blog de Daniel Hollande (Regno Unite)
Mardy (Italia / Finlandia)
Blog personal de Peter Kovacs (Hungaria)
Blogg Marteins Sveinssonar (Norvegia)
Recolta Floreal (Brasil)
Lingoblog (Finlandia)
Le blog de Erik Enfors (Svedia)
Internodio (Nederland / Hungaria)
Interlingua Roma (Italia)
Francisco Forgiamonte (Germania)
Blog del U.M.I. (ligamine non permittite)

2008/08/27

Le U.M.I. prohibi le ligamines profunde

Io ha controlate tote le ligamines in le columna al dextra - removente sitos que non plus functiona e blogs non actualisate durante le ultime medie anno. Tosto io va includer nove ligamines.

Ben, io anque ha removite le ligamines al Interlingua English Dictionary e al lista de E-libros in interlingua.

Proque io ha facite isto?

Le Interlingua English Dictionary e le bibliotheca electronic es partes del sito del U.M.I. - e le Union Mundial pro Interlingua non permitte ligamines profunde ab altere sitos.

Un "ligamine profunde" es un ligamine que liga a un pagina singular ultra le pagina principal del sito. Le rete es plen de ligamines profunde. Le rete naturalmente non pote functionar sin ligamines profunde. Ma le sito official del Union Mundial pro Interlingua desidera exister sin tal ligamines.

Proque le U.M.I. non permitte ligamines profunde? Io non sape. Honestemente, quando on pote reincluder un ligamine directemente al Interlingua English Dictionary?



P.S. Io naturalmente non pote ligar al pagina singular in le qual on trova iste prohibition - proque le U.M.I. non permitte isto, etc.


Wikipedia anglese: Deep linking (he, wikipedia non prohibi ligamines profunde!)

Summario in norvegiano: Verdensorganisasjonen for interlingua (U.M.I.) forbyr "dyplenking" - alminnelige lenker til undersider - på nettstedet sitt. Kun lenker til hovedsiden er tillatt. Hvorfor det? Det vet jeg ikke.

2008/08/20

Wikipedias in linguas artificial

Existe wikipedias in plus que 250 linguas. Quando on face listas, le plus sovente on los organisa secundo le numero de articulos, con le wikipedia in anglese como le numero uno. Naturalmente, le numero de articulos non es un proba de qualitate, como ha monstrate le controversia concernente le wiki del volapük.

Al momento existe wikipedias in septe linguas artificial:

Volapük, con 117.529 articulos.
Esperanto, 102.881.
Ido, 15.863.
Interlingua, 4.283.
Novial, 2.436.
Occidental/Interlingue, 1.138.
Lojban, 685.

Le wikipedias in Klingon e Toki Pona ha essite claudite.

Vide anque: Volapük tosto le lingua le plus diffundite del mundo

2008/06/01

Nive!



Le glacia polar disgela - e in Bergen nos ha 10 centimetros de nive ... no, isto non es ver. Non del toto. Es solmente mi phantasia del die. Nos ha 24 grados - un poco troppo calide secundo mi gusto ... ma le apparition del multe puellas a pena vestite naturalmente es benvenite. (Ma por illos qui prefera le jachettos de pelle etc: le pensionarios del KISS es in le urbe ...)

Le photo era facite le 27 de martio. (Original a Origo.)

2008/05/21

Professor del germano assassinate per esperantista invidiose?

Un professor del francese occidite per un regula, e su collega del germano per un compasso! Le culpabile? Le professor del mathematica, evidentemente. E proque? Un esperantista, ille era invidiose del successo del altere linguas ...

Le rubrica del Norvega Esperantisto nr 2/08 tosto capeva mi attention: "Kiam krimo interesigas pri Esperanto" (Quando un crimine crea interesse pro esperanto). Secundo le articulo, un emission televisive plus que duplava le numero de visitatores al sito www.esperanto.no. In le programma del station TV2 on presentava, in un stilo legier e humoristic, consilios al personas qui desidera scriber contos criminal. Le exemplo - "le professor invidiose qui occideva su collegas" - era create in cooperation con le Norvegian Liga Esperantista.

Naturalmente, il non ha delinquentes potential - e probabilemente non mesmo autores de contos criminal - in nostre ronda innocente de interlinguistas. Ma forsan, si tote lectores de iste blog visita le sito del esperantistas norvegian, nos poterea mesmo triplar lor numero de visitatores. Clicca al pictura, o al ligamine, e attende le responsa in le veniente numero del Norvega Esperantisto!


Summario in esperanto: En leĝera televidprogramo Esperanto uziĝis kiel motivo de du murdoj en ekzemplo pri tio, kiel krei krimrakonton. Efekto de tio estis pli ol duobligo de la trafiko ĉe la retejo de Norvega Esperantista Ligo. Eble la vizito de interlinguistoj el la tuta mondo povas eĉ triobligi la trafikon!

Summario in norvegiano: I TV2-programmet "Hjelpekorpset" ble esperanto brukt som motiv for to drap i et eksempel på hvordan man kan lage en krimfortelling. Eksempelet, som ble laget i samarbeid med Norsk Esperanto-Forbund, førte til en fordobling av trafikken på forbundets nettsider. Kanskje kan besøkende interlinguister fra hele verden nå føre til en tredobling av trafikken!

Kolosali krokodili, le fin del Belgica imaginatori ...

Belgica ha tres linguas official (francese, nederlandese, germano) - e de tempore in tempore on pote haber le impression que le unitate del pais es un poco imaginatori.

Esque le contribution belge al Eurovision del Chanson debe esser in le nederlandese o in le francese? Iste demanda naturalmente pote instigar debattos in le parlamento federal.

Iste anno le entrata belge era "O Julissi", cantate per le banda Ishtar - in un lingua imaginatori:

O julissi na jalyni,
O julissi na dytini
O bulo diti non slukati
Sestrone dina katsu

Un altere verso:

Pokoli sestro moja kona
Pokoli meni dita boja
Jalina pitsu marusinja
Kolosali krokodili

(Texto complete)

Regrettabilemente "O Julissi" era eliminate in le prime semifinal (durante que le entrata norvegian, cantate in anglese per Maria Haukaas Storeng, se qualificava pro le final). Le semifinales e le grande final trova loco in le capital serbe, Belgrado.


(Duo annos retro anque Nederland participava con un chanson in un lingua imaginatori: Amambanda gwena mambanda.)

2008/05/15

Amy Winehouse retorna a Bergen

Le appello del artista Amy Winehouse contra le mulcta de 4000 coronas (800.000 lire italian) trova loco le 12 de januario de 2009, in Sala 2A del Palacio de Justitia.

Secundo le policia norvegian, Winehouse era in possession de 7 grammas de amphetamina quando illa era arrestate in octobre de 2007. Le artista pensa que isto solmente es un del errores facite per le policia durante su sojorno in Bergen. Le procurator general vide le cosas de altere maniera ...


Vide anque: Prosperitate?.

2008/05/08

Vita intelligente in le Casa Blanc

De tempore in tempore il me sembla que le apparition de nove blogs in interlingua es tanto infrequente como vita intelligente in le Casa Blanc ...

Felicemente, Falcatorrosa-Rosenmeier ha trovate non minus que tres nove blogs! Si, il es ver: durante le ultime medie anno io non ha cercate tracias de vita in nostre blogosphera.

Il se tracta de nove blogs de Finlandia, de Italia e de Anglaterra.

LingoBlog, de Finlandia, discute le problemas de interlingua, los trovante in le pronuciation e in le formas archaic del lingua. Io non es completemente de accordo, ma le discussion naturalmente es importante. Mi objection: si solmente cent (o mil) homines parla interlingua, non importa si iste poc homines dice "haber herpete" o "haver herpes". Le interlinguistas debe partir del grottas del 20-me seculo - e rumper le circulos vitiose que impedi le disveloppamento del lingua.

E, si, io spera que Hillary vince le electiones del Statos Unite, ma le retorno de Bill Clinton al Casa Blanc al momento sembla solmente un poco plus probabile que le acceptation general de interlingua como lingua international.

2008/04/29

Volapük tosto le lingua le plus diffundite del mundo

Secundo Novlangue, le chronista infatigabile de un mundo de plus in plus bizarre, le wikipedia del lingua volapük consiste de non minus que 118.700 articulos. Isto naturalmente es un poco exaggerate, ma solmente un poco: in iste momento le numero (constantemente crescente) de yegeds ha attingite 116.286. In comparation: le wiki de Esperanto, le lingua que on generalmente ha considerate le lingua artificial le plus succedite, ha "solmente" 97.943. (Le wikipedia in interlingua al momento ha 4.152 articulos. Un addition recente, le wikipedie in Novial, le lingua de Otto Jespersen, ha 2.429.)

Recentemente, le numero de articulos in le vükiped ha essite un fonte de controversia non solmente in le movimento volapükista, ma anque in le campo esperantista. Secundo Libera Folio, bulletin independente del movimento, le "culpabile" es Sergio Meira, volapükista (e esperantista) brasilian, qui ha create un multitude de articulos curte (partialmente con le adjuta de un programma que crea automaticamente milles de articulos geographic).

2008/04/25

Le italianos ama Amy Weinhaus

Recentemente, durante le ultime menses, durante le quales io non ha actualisate mi blog, le contator del blog ha registrate un numero astronomic (quasi 90 % del visitatores) de italianos qui, evidentemente, ama Amy Winehouse (o la odia, naturalmente, io non lo sape), e se pensante creder que le stella britannic se nomina "Amy Weinhaus", se trova finalmente ante un entrata ubi un compatriota sue se ha signate con iste orthographiation intentionalmente (io lo spera) erronee de su nomine ...

Ben, io pote comprender que on pote confunder le diverse linguas germanic: "Winehouse" in anglese, "Weinhaus" in germano, "Wijnhuis" in nederlandese, "Wynhuis" in afrikaans, "Wynhûs" in le frison, e simplemente "Vinhus" in le linguas scandinave, nynorsk includite (ma le scandinavos naturalmente non porta tal nomines). E, on debe admitter lo: Martin Luther, le fundator del orthographia german (e de un quantitate non insignificante de altere cosas non tanto amusante), evidentemente ha trovate un maniera de scriber que reflecte non solmente le pronunciation german ma anque lo del anglo-saxones moderne. (A vostre sanitate!)

Pro illos, italianos e alteres, qui ancora se interessa del visita famose de sra Winehouse a Bergen, io in humilitate me permitte de recommendar iste entrata del blog. E, pro le italianos: ecce como cercar informationes de Amy Winehouse per le goolge italian. (O visita le wikipedia in interlingua.)


In le photo: le Tres Gratias - nulle vino, nulle casas, ma tres bottilias de bira. ("Le bira non era presente quando le photo era facite ... ")