2006/05/27

Si non pluve alterubi, pluve al minus in Bergen

In Bergen pluve annualmente plus que 220 dies - p.ex. hodie. Cata die ha su proprie atmosphera, su temperatura, su lumine, su direction del vento, su colores, su motivos. In le pluvia nasce le sperantia, non solmente pro le agricultores e le possessores del cafés, ma anque pro illos qui attende le autobus.

"Si non pluve alterubi, pluve al minus in Bergen" - iste vetule proverbio io trovava in un libro del 18-ve seculo: "Le Description de Bergen, le famose Citate de Commercio" per Ludvig Holberg.

Mappa de interlinguistas

A frappr, un del exponentes del si nominate Web 2.0, on trova un mappa con usatores de interlingua in tote le mundo - vide le blog de Lars pro le adresse. (Quando io me addeva, le numero de congressos international ancora superava le numero de personas, ma iste situation va cambiar, nonne? E qui es Matt, le amico de "tote le mundo"?)

E ... in le mappa io trovava un nove blog interessante: Le Oculo Interlinguistic. (Myskina batteva Pironkova, ma ...)

2006/05/24

Le fin de Yugoslavia

Alicun dies retro, le habitantes de Montenegro votava in favor al separation de Belgrado. Secundo le prime notitias, le armea va respectar le voce del populo. Si le autoritates serbe vermente lassa al montenegrinos le possibilitate de determinar lor proprie destino, isto naturalmente es un situation completemente nove in iste region - comparabile solmente con le division de Checoslovachia in 1993.

"Le fin de Yugoslavia". Iste rubrica io legeva in un jornal serbe, in Croatia, al die del independentia in 1991. In le annos sequente, le crueltate del guerra civil surprendeva le mundo.

Slobodan Milosevic era le homine forte de Belgrado, ma le Republica Federative Socialista Yugoslavia se disintegrava in Slovenia, Croatia, Bosnia e Hercegovina, Macedonia, serbia e Montenegro. (Hodie, le sol allusion al nomine Yugoslavia, on trova, ironicamente, in le nomine "international" de Macedonia, imponite per Grecia e Le Union Europee: "Le ex-republica yugoslave de Macedonia".)

Yugoslavia - "le pais del slavos del sud" - era fundate in 1918, in un region historicamente dividite per linguas, religiones e alphabetas. Ancora resta le conflicto le plus ancian - illo del serbos e del albaneses de Kosovo. (Le kosovares naturalmente non es "slavos del sud".) Ambe populos memora le battalia de Kosovo Polje in 1389. Esque on succede determinar le "status final" de Kosovo sin plus de sanguine?

Quando io entrava Yugoslavia in le estate de 1991, io incontrava un homine de medie etate, un yugoslavo qui retornava de Germania. In le traino nos discuteva, in le germano, le situation de plus in plus tense: Si Slovenia e Croatia vermente declarava le independentia, esque isto significarea le guerra? Su opinion: Belgrado declararea le guerra a Croatia, ma Slovenia serea troppo lontan. (Si, ille habeva ration). E su proprie citate pacific? Nulle periculo!

In Ljubljana io le diceva adeo. Ille retornava ... a Sarajevo.

Le blog va continuar

Gratias pro le commentarios e le messages! Vos me ha date le motivation necessari pro continuar le blog - e sperabilemente vos va leger lo anque in le futuro. Io anque spera que nos va vider le creation de nove blogs - in addition al blogs que ja existe - in interlingua, e in altere linguas auxilliar.

2006/05/21

Le beltate e le monstros, le chansons e Europa

Malgrado le facto que iste blog officialmente non plus va esser actualisate, io simplemente non pote ignorar le sol evenimento que uni le continente europee - le Concurso Eurovision del Chanson. Como nos sape, Lordi, le monstros sympatic de Finlandia, vinceva con lor "Hard Rock Hallelujah", le contribution perfecte a nostre tempore.

Plus que 100 milliones de spectatores reguardava le final in Athenas, le capital grec, ubi participava entratas de 24 paises, de Islanda a Israel (le membros arabe del EBU, secundo le tradition, non prendeva parte) - un interessante combination de kitch e nationalismo, introducite per alicun secundas de Charpentier (sovente le sol melodia que on memora le die sequente).

Como sempre, le show era impurificate, de un certe mesura, per anglese balbutiate (le "bad english" naturalmente es in le processo de devenir le sol lingua unificatori de Europa). Malgrado le membrato de Grecia in le Francophonia, le rolo del secunde lingua official del EBU era reducite a un minimo. E nos videva le transgression al anglese anque del presentation del punctos albanese. (Usque le anno passate, le albaneses sempre presentava lor punctos in le francese.) Le presentatrice monegasc faceva un effortio pro reganiar territorio perdite, ma io habeva le impression que le hospites del show non comprendeva lo que illa diceva.

Felicemente, le entrata norvegian, le ballada Alvedansen ("le Dansa del Elfs"), cantate per Christine Guldbransen (de Bergen) era presentate in ... le norvegiano. Infelicemente, illa era solmente le numero 14, dunque Norvegia non mesmo es qualificate pro le final del anno veniente.

Le final del Concurso Eurovision del Chanson 2007 va trovar loco in le pais de Matti Nykänen, del fratres Kaurismäki e del guerreros hakkapeliita. Io es certe que le presidente del Association Finlandese pro Interlingua va trovar le perfecte strategia: como facer interlingua le sol lingua del final de Helsinki!

2006/05/13

Le porto de Bergen - II

Zachariasbryggen e le Mercato del Pescatores.

Le porto de Bergen - I

"Aida Blue". Le barca "Statsraad Lehmkuhl". Le Turre de Rosenkrantz.

Le passato del internet, un archivo pro le futuro

Le internet cambia de die in die. Esque on pote "visitar" le internet del passato, p.ex. del anno 2000? Le responsa es: Si, al minus partialmente! Le "WayBackMachine" del Internet Archive ha colligite un quantitate enorme de paginas e sitos, de 1996 a hodie.

Io trovava facilemente le sito del U.M.I. in su version del 2 de decembre 1998, con ligamine i.a. al Radio Interlingua. (Al mesme tempore, le sito del Association Universal Esperantista era solmente un germine). E ecce le sito clar e simple del "vetule" U.M.I. (archivate le 31 de martio 2005) - regrettabilemente sin le picturas.

Le contento del WayBackMachine anque pote esser cercate via le sito del Bibliotheca Alexandrina de Egypto.

2006/05/11

Wikipedias: interlingua inter islandese e hindi

Io liga a un interessante entrata in le blog de Ethan Zuckerman. Le thema es wikipedias in linguas diverse: Your language or mine?

Ille i.a. se demanda como le numeros del articulos in le diverse wikipedias non sempre sta in relatition directe con le numero del homines qui parla le linguas.

Exemplo: le wikipedia islandese ha 10.059 articulos (Islanda ha 300.000 habitantes) durante que le wikipedia hindi solmente ha 1296 articulos (malgrado le facto que India ha 50 milliones de usatores de internet).

E nos pote demandar: como le wikipedia in ido ha 13,262 articulos, durante que le version in interlingua solmente ha 3.083?

2006/05/07

Absente

Un septimana retro - bandieras rubie.

Le 1 de Maio in Bergen: un gruppo de juvenes con bandieras rubie parti del area hanseatic pro affiliar se con le manifestation.

Ma le revolution es absente.