2006/01/22

Le melior patinator del mundo, e le distantia le minus excitante

Esque on pote comparar patinatores de epochas differente? Si illes habeva le mesme conditiones ... esque Johann Olav Koss batterea Oscar Mathisen? Le glacie era differente - e le patines, le vestimentos, le methodos de trainar etc. E nos non oblida le beneficios del pistas sub tecto! Es como comparar linguas - que es le melior lingua del mundo? Ma Team Support Systems ora ha facite le comparation (non del linguas, ma del patinatores).

Per medio de calculationes que neutralisa tote le differentias, le firma nederlandese ha compilate listas del distantias diverse e del completo. Ecce lor melior patinatores masculin de tote le tempores:

1. Eric Heiden (Statos Unite)
2. Ard Schenk (Nederland)
3. Clas Thunberg (Finlandia)
4. Ivar Ballangrud (Norvegia)
5. Oscar Mathisen (Norvegia)
6. Johann Olav Koss (Norvegia)
(
Lista complete)

Heiden vinceva tote le cinque distantias al Jocos Olympic de Lake Placid in 1980. Schenk era un nomine celebre in le annos '70, Thunberg e Ballangrud era campiones del annos '20 e '30, e Koss dominava le Olympicos de 1994 a Lillehammer. Mathisen vinceva su prime Mundial in 1908 e su ultime (como professionalista) in 1920. Ben, Koss non batterea Mathisen. Interessante.

De facto, iste listas solmente es un "labor preliminari". Le scopo final es un classification del melior patinatores del presente - comparabile a illos del ATP e WTA del tennis. Le prime lista va esser presentate in februario.

***

Personalmente io ha sempre considerate le 5.000 m le minus "excitante" del quatro distantias classic del patinage de velocitate. E ora io forsan ha trovate le ration: Secundo le datos del Team Support Systems le melior 5.000 m ancora sembla esser le 8.37,6 del nederlandese Jaap Eden, a Hamar le 25 de februario 1894 - non minus que 112 annos retro! Impressionante.

(In parentheses: Jaap Eden patinava le melior 5.000 m de tote le tempores durante le secunde die del Campionato Europee de 1894. Eden non participava in le 500 e le 1.500 m del prime die, officialmente (lo que on telegraphava a Nederland) pro le forte colpos de vento sur le glacie del laco Mjøsa. Ma secundo altere fontes ille passava le matino in le lecto - con un camerera del hotel "Victoria" - in vice de presentar se pro le 500. Postea ille refusava prender parte in le 1.500 m proque ille, secundo le regulamento, debeva patinar sol, non habente participate in le prime distantia.

Le die sequente, Eden - plen de fortias e remorso - reappareva sur le glacie e batteva le record del 5.000 per 29,4 secundas. 8.37,6 restava record mundial usque a 1911. In tote casos, un memorabile fin de septimana a Hamar.)

2006/01/13

Paraskavedekatriaphobia!

Le parola del die: Paraskavedekatriaphobia. Es un parola que consiste de quatro elementos grec: Paraskavi (venerdi), deka (dece), tris (tres) e phobia (pavor), dunque: le pavor del venerdis 13!


Wikipedia: Friday the 13th

2006/01/09

Janet Jackson, le pausa del Super Bowl de 2004 e le zeitgeist de 2005

Que cerca homines in le internet? Google (e altere cercatores) publica regularmente listas del parolas le plus cercate. Esque on trova lo que on cerca? Qui sape?

In mi blog io vide que visitatores cerca parolas specific e arriva a un pagina particular, p.ex. "football cypriota", "idiom neutral" e "mandombe". Recentemente un parola popular ha essite "kakuro".

Ecce le lista de Google News pro le anno 2005:

1. Janet Jackson, 2. Hurricane Katrina, 3. tsunami, 4. xbox 360, 5. Brad Pitt, 6. Michael Jackson, 7. American Idol, 8. Britney Spears, 9. Angelina Jolie, 10. Harry Potter.

Isto es le zeitgeist (animo del tempore) vidite per le berillos cercante de Google. Si, 2005 era le anno del huricane Katrina e le anno post le tsunami terribile ... ma anque le anno del nove xbox, del nove libro e del nove film del phenomeno Harry Potter. E Michael Jackson naturalmente habeva su momentos ...

Ma, Janet, le soror de Michael? Le 1 de februario 2004 le sino nude de Janet Jackson era televisate durante le pausa del Super Bowl, causante un scandalo que evidentemente offendeva multe americanos plus de tote altere injustitia.

Esque iste breve secunda del pausa de un match de football american duo annos retro ancora influa le zeitgeist del momento? E qui diceva que le mundo non es absurde?


2005 Year-End Google Zeitgeist

2006/01/07

De trolls e governamentos

In un entrata previe (in octobre) io ha mentionate nostre nove governamento. Si, le coalisation rubie/verde del prime ministro Jens Stoltenberg ancora functiona ... Esque ille ha succedite construer un tripede stabile de tres partitos differente? Forsan. O esque le governamento ancora es un troll del fabulas popular? (Un troll pote haber un numero infinite de capites.)

Heri, Kristin Halvorsen, capite del Partito Socialista del Leve, debeva publicamente facer su excusas proque illa invitava consumitores norvegian a un boycott de productos de Israel. Le boycott de Israel es un politica traditional de su partito, ma Halvorsen evidentemente non memorava que illa al momento es le ministro del financias.

Stoltenberg e Jonas Gahr Støre, le ministro de affaires estranier, la informava que le governamento norvegian es un amico de Israel, e le politica estranier es le affaires del ... ministro del affaires estranier.

Io opina que le Partito Socialista del Leve ha essite un excellente partito de opposition - e io pote facilemente comprender que on de tempore in tempore oblida su nove rolos. Le "pecator" le plus remarcate ha essite Øystein Djupedal, le ministro de education. Amusante pro le publico, non tanto amusante pro le politicos concernente ...

E al mesme tempore le prime ministro de Israel es in coma. Ariel Sharon duceva guerra contra le arabes durante un medie seculo. Recentemente le politica de occupation ha ducite al construction de un muro contra le palestinenses. Ma le muro naturalmente non impedi le fermeros de exportar lor oranges de Jaffa.

In le pictura: un troll (con solmente un capite). Designo classic de Th. Kittelsen (1857-1914).

2006/01/03

Action frison - dominio del commissionero capturate

Fryske Aksje (Action Frison) ha "capturate" le dominio www.ednijpels.nl. Le politico Ed Nijpels es le Commissionero del Regina in le provincia Frisia, in le nord de Nederland.

Le Action Frison intende "liberar" le dominio solmente quando Ed Nijpels ha commenciate parlar le frison publicamente, preferibilemente in le parlamento provincial - secundo le information que appare quando on clicca sur le facie del pirata.

(Io essayava capturar le adresse umi.blogspot.com - ma illo ja era occupate. Esque on forsan pote atender le blog del nove U.M.I.? On videra le 15 de januario.)

Le bandiera del cordes naturalmente es illo de Frisa, cognoscite per tote illos qui ama le patinage de velocitate. E le lingua frison es - historicamente - le parente le plus proxime del anglese, hodie fortemente influite per le nederlandese.


Secundo Communicatielog

Le plumbero de Bloglines

Esque vos anque ha vidite le "plumbero" de Bloglines le ultime duo dies? Es Newman, le vicino de Seinfeld, nonne? O esque io me erra?

2006/01/01

Bon Anno Nove!

2006 es le anno del Jocos Olympic de Torino, le anno del Campionato Mundial de football, le anno de Rembrandt e le anno de Mozart ...

... ma super toto 2006 ancora es un anno sin conclusiones, un anno con tote optiones, un anno ancora plen de possibilitates ...

Io desidera a totes un bon anno nove!