2006/12/02

Laurens Janszoon Coster, typographo legendari de Haarlem

Sur le Grande Mercato de Haarlem, apud le ecclesia gothic de Sancte Bavo, on trova le statua de Laurens Janszoon Coster. Le statua se data de 1856 e porta un texto in latino classic:

"TYPOGRAPHIAE LITTERIS MOBILIBUS E METALLO FUSIS INVENTOR"

Secundo le legenda, Coster era "le inventor del typographia con litteras movibile de metallo". Ille facerea su invention in le anno 1423 (o in 1428, o in 1430). Post le morte de Coster, in le peste de 1440, le discipulo enigmatic, Fust (o Faust?), vendeva le secreto a Johannes Gutenberg, qui finalmente imprimeva su famose Biblia a 42 lineas verso 1455. Foras de Nederland, Gutenberg generalmente ha essite acceptate como le inventor del typographia.

On non ha trovate ulle provas de libros imprimite in Haarlem ante le tempore de Gutenberg. Un serie de vetule libros, previemente attribuite a Coster ("Costeriana"), probabilemente se data de post 1470.

Secundo historicos moderne, iste inventor legendari del typographia nunquam ha existite. Ma resta un belle legenda. E un statua impressionante in le capital de Hollanda del Nord.

P.S. Le equivalente nederlandese del Projecto Gutenberg - un collection de textos classic in forma electronic - (naturalmente) porta le nomine Projecto Laurens Janszoon Coster.


Ligamines:
The Legend of Koster
Project Laurens Jz Coster

3 comments:

Jesus of Nazareth said...

Un biblia in 42 lineas? imcredibile

Johann Amadeus von Goethenbach said...

Nulle problema, si le lineas es sufficiente longe. (Nulle problema in le germano.)

Paulus de Tarsus said...

In un Biblia a 42 lineas (non "in" 42 lineas!) cata pagina ha 42 lineas. Si on usa un grande numero de paginas, isto pote sufficer pro tote le Biblia.