2006/05/24

Le fin de Yugoslavia

Alicun dies retro, le habitantes de Montenegro votava in favor al separation de Belgrado. Secundo le prime notitias, le armea va respectar le voce del populo. Si le autoritates serbe vermente lassa al montenegrinos le possibilitate de determinar lor proprie destino, isto naturalmente es un situation completemente nove in iste region - comparabile solmente con le division de Checoslovachia in 1993.

"Le fin de Yugoslavia". Iste rubrica io legeva in un jornal serbe, in Croatia, al die del independentia in 1991. In le annos sequente, le crueltate del guerra civil surprendeva le mundo.

Slobodan Milosevic era le homine forte de Belgrado, ma le Republica Federative Socialista Yugoslavia se disintegrava in Slovenia, Croatia, Bosnia e Hercegovina, Macedonia, serbia e Montenegro. (Hodie, le sol allusion al nomine Yugoslavia, on trova, ironicamente, in le nomine "international" de Macedonia, imponite per Grecia e Le Union Europee: "Le ex-republica yugoslave de Macedonia".)

Yugoslavia - "le pais del slavos del sud" - era fundate in 1918, in un region historicamente dividite per linguas, religiones e alphabetas. Ancora resta le conflicto le plus ancian - illo del serbos e del albaneses de Kosovo. (Le kosovares naturalmente non es "slavos del sud".) Ambe populos memora le battalia de Kosovo Polje in 1389. Esque on succede determinar le "status final" de Kosovo sin plus de sanguine?

Quando io entrava Yugoslavia in le estate de 1991, io incontrava un homine de medie etate, un yugoslavo qui retornava de Germania. In le traino nos discuteva, in le germano, le situation de plus in plus tense: Si Slovenia e Croatia vermente declarava le independentia, esque isto significarea le guerra? Su opinion: Belgrado declararea le guerra a Croatia, ma Slovenia serea troppo lontan. (Si, ille habeva ration). E su proprie citate pacific? Nulle periculo!

In Ljubljana io le diceva adeo. Ille retornava ... a Sarajevo.

2 comments:

Lars said...

Interessante entrata. Proque esseva tu in Yugoslavia in ille tempore inquiete?

Am.
Lars

Morten Svendsen said...

Si, que faceva io in Yugoslavia? Io "explorava le mundo" e Yugoslavia era un pais que me placeva multo. Io visitava le pais anque in 1990. Naturalmente, in retrospecto, on pote dicer que entrar Yugoslavia in le estate de 91 non era le melior del ideas, ma, al altere latere, in ille dies on ancora non cognosceva le consequentias del situation. Io non ha retornate al paises del ex-Yugloslavia post le guerra civil, ma forsan un die ...