2006/01/22

Le melior patinator del mundo, e le distantia le minus excitante

Esque on pote comparar patinatores de epochas differente? Si illes habeva le mesme conditiones ... esque Johann Olav Koss batterea Oscar Mathisen? Le glacie era differente - e le patines, le vestimentos, le methodos de trainar etc. E nos non oblida le beneficios del pistas sub tecto! Es como comparar linguas - que es le melior lingua del mundo? Ma Team Support Systems ora ha facite le comparation (non del linguas, ma del patinatores).

Per medio de calculationes que neutralisa tote le differentias, le firma nederlandese ha compilate listas del distantias diverse e del completo. Ecce lor melior patinatores masculin de tote le tempores:

1. Eric Heiden (Statos Unite)
2. Ard Schenk (Nederland)
3. Clas Thunberg (Finlandia)
4. Ivar Ballangrud (Norvegia)
5. Oscar Mathisen (Norvegia)
6. Johann Olav Koss (Norvegia)
(
Lista complete)

Heiden vinceva tote le cinque distantias al Jocos Olympic de Lake Placid in 1980. Schenk era un nomine celebre in le annos '70, Thunberg e Ballangrud era campiones del annos '20 e '30, e Koss dominava le Olympicos de 1994 a Lillehammer. Mathisen vinceva su prime Mundial in 1908 e su ultime (como professionalista) in 1920. Ben, Koss non batterea Mathisen. Interessante.

De facto, iste listas solmente es un "labor preliminari". Le scopo final es un classification del melior patinatores del presente - comparabile a illos del ATP e WTA del tennis. Le prime lista va esser presentate in februario.

***

Personalmente io ha sempre considerate le 5.000 m le minus "excitante" del quatro distantias classic del patinage de velocitate. E ora io forsan ha trovate le ration: Secundo le datos del Team Support Systems le melior 5.000 m ancora sembla esser le 8.37,6 del nederlandese Jaap Eden, a Hamar le 25 de februario 1894 - non minus que 112 annos retro! Impressionante.

(In parentheses: Jaap Eden patinava le melior 5.000 m de tote le tempores durante le secunde die del Campionato Europee de 1894. Eden non participava in le 500 e le 1.500 m del prime die, officialmente (lo que on telegraphava a Nederland) pro le forte colpos de vento sur le glacie del laco Mjøsa. Ma secundo altere fontes ille passava le matino in le lecto - con un camerera del hotel "Victoria" - in vice de presentar se pro le 500. Postea ille refusava prender parte in le 1.500 m proque ille, secundo le regulamento, debeva patinar sol, non habente participate in le prime distantia.

Le die sequente, Eden - plen de fortias e remorso - reappareva sur le glacie e batteva le record del 5.000 per 29,4 secundas. 8.37,6 restava record mundial usque a 1911. In tote casos, un memorabile fin de septimana a Hamar.)

3 comments:

Anonymous said...

Congratulationes pro iste excellente articulo. Tanto le contento como le stilo me place multo. Ma attention:

glatie > glacie
cameriera > camerera

Gonçalo Neves

Morten Svendsen said...

Gratias pro le commentario e le correctiones. Ora io ha corrigite le parolas.

algus said...

Car Morten
Nun c io ha apprendite un nove parola in interlingua- patinator.
Gratias pro tu artculo intressante.
Alf