2005/12/21

Solstitio hibernal - le festa del sol e le Jul nordic

Solstitio hibernal. Le nocte le plus longe del anno. E le die le plus curte ...

In nostre tempores de inquietude on naturalmente pote determinar le momento precise del solstitio. Le solstitio hibernal de 2005 es le 21 de decembre (hodie) a 18 horas e 35 minutas UTC. (Isto es in le hemispherio nord - in le sud on naturalmente es in plen estate.)

In le antique tradition nordic iste die era jól, le celebration del sol, un del festas le plus importante del anno. Al nord de Scandinavia le sol non se leva super le horizonte durante multe septimanas in le tempore de hiberno. Le solstitio dava nove sperantia. Anque in altere culturas on celebrava iste die.

Quando reges e missionarios introduceva le christianismo, 1000 annos retro, le festa del sol se confundeva con le celebration del Natal. Ma in Scandinavia le parola remane, e le prestres non succedeva jammais a reimplaciar totalmente le traditiones pagan. Hodie le 24 de decembre es jul, jol o joulu in le paises nordic.

On probabilemente retrova iste parola antique anque in le francese, ubi jolie originalmente significava "gai, allegre, hillare" - forsan un indication del natura del festa pagan! E anque in le anglese on pote dicer yule (in vice de Christmas).

Ma le die mesme - le solstitio hibernal - se perde sovente in le preparationes sempre plus commercial del Natal moderne.

Io desidera un jul allegre a tote lectores e visitantores del blog!

1 comment:

Petro Ferrero de Hungaria said...

Car Morten e lectores!

Super simile cosas concernente le hungaros io scribe in mi blog, sub le entrata http://zalaegerszeg.blogspot.com/2005/12/comparation-de-traditiones-bulgare-e_10.html a proposito del presentation de Stefka Yoncheva in Asa, Svedia, le loco del conferentia international de interlingua super le traditiones bulgare.

Le ancian hungaros nunquam adorava le sol, como un deo, ma certemente como le loco ubi Deo (i. e. Christo) habita.

Péter