2005/11/03

Un nove blog cata secunda

Secundo Technorati Weblog appare 70.000 nove blogs cata die, isto es un nove blog cata 1,23 secundas. Le numero de blogs se dupla cata 5te mense.

Iste statisticas monstra le popularitate enorme del blogs. Blogwise lista blogs in 206 paises (Corea del Nord includite). Existe blogs mesmo in le Klingon. E on naturalmente trova blogs de omne themas - de linguas artificial a feminas nude. Multe homines usa blogs pro publicar su diarios personal. Per commentarios on pote debatter e disputar.

Es natural que interlingua, le latino moderne, trova su loco in le mundo del blogs.

In le mundo existe plus que 6000 linguas, ma solmente 10 procento de illos es representate in le internet. Que es le futuro del linguas que ancora non es representate? Cata 14te die un lingua cessa de esser parlate ...

Es importante que interlingua fortifica su position in le internet, e io opina que blogs es un excellente maniera de visualisar le presentia de un lingua. Le numero de blogs es un indication del vitalitate de un lingua.

Nos besonia multe blogs - con ligamines le un a le alteres. Le ligamines es multo importante: si un persona trova un blog in interlingua, ille o illa pote sequer le ligamines e trovar multe altere blogs.

E ancora: cercatores como Google e Technorati usa le ligamines pro calcular le "importantia" de un blog - un cercator ordina le presentation secundo le numero de ligamines que duce al blogs trovate.

Nos debe crear un blogsphera in interlingua. Esque io pote facer un ligamine a tu blog?


Tags: , ,

2 comments:

Morten Svendsen said...

Algus: Gratias pro tu commentario (que se trova ci):

"Morten
Gratias pro tu articulo si demonstrative re blogs e interlingua.
Io ha scribite in SSIforum e exhortate le membros de leger su
articulo .
Io spera que multe interlinguistas in Svedia lo lege e commencia de usar blogs pro le developpamento de interlingua."

torrente said...

Car Morten!

Congratulationes a un blog multo professional. Speerabilemente tu respecta le regulas de copyright, specialmente re imagines. Il non esserea bon reclamo pro interlingua si nos los contraveni.
Thomas Breinstrup, qui es un jornlista, ha ha scribite un curte summario del regulas que io pote inviar si tu lo desira.
Tu articulo "Un nove blog cata secunda" e io volerea inserer un traduction de illo in Actualitates si tu lo permitte.