2005/11/19

Interlingua in le Bibliotheca National de Austria

Le 1 de decembre le Museo de Esperanto e le Collection pro Linguas Planate, partes del Bibliotheca National de Austria, reaperi in le Palatio Mollard in le capital Vienna.

Le Collection pro Linguas Planate era fundite in 1927 per Hugo Steiner, e es un parte del Bibliotheca National desde 1929. Illo contine le plus grande collection de linguas planate in le mundo, con documentation de plus que 500 linguas - "con nomines sonor como Volapük, Ido e Interlingua."

Adresse:
Palais Mollard
Herrengasse 9
Vienna, Austria

(Secundo Damals)

Esperantomuseum und Sammlung für Plansprachen
Cerca in le Collection (Scribe p.ex. "interlingua" e pressa "Suchen")

4 comments:

Petro Ferrero de Hungaria said...

Car Morten!

Io vide, tu ha un interesse interlinguistic (= al brachio interlinguistica del scientia "linguistica applicate".) Io era studente del linguistica applicate e nostre professora (qui es un esperantista) nos apportava in Vienna in ille museo, que tu mentiona in tu articulo, ubi illa ha olim mesmo laborate. Alora io era ancora un esperantista (ma io non deveniva un tal pro ulle influentia de mi professora, qui nos inseniava le objecto de studio "interlinguistica", ma io deveniva un tal ja in 1990 o 89, multe ante que io comenciava mi studios universitari in 1998, ante de cognoscer la del toto). Alora io regrettabilemente non cognosceva interlingua e non demandava super iste lingua del homine (Herbert, o como se appella), qui faceva un presentation pro nos. E assi io non sape anque, esque on pote prestar libros o brochures de iste museo de esperanto (e linguas planate). Esque tu sape? Esque anque pro estranieros, como io, de Hungaria? Il ha vermente multe trovatas in le cercario (hu, un nove parola! :) ) electronic in-linea del museo; ma illos vale nihil, si iste libros e publicationes non es a prestar.

Amicalmente:

Péter Kovács

Morten Svendsen said...

Io non sape si on pote prestar libros ab le estraniero, ma isto es fortemente a dubitar. Ma on pote forsan sperar que on, in le curso de alicun annos, va digitalisar le collection e facer lo disponibile in le rete.

Io nunquam ha visitate iste museo. De facto, io ha visitate Vienna solmente un vice - quando io viagiava a Hungaria, pro un campo de esperantistas.

Petro Ferrero de Hungaria said...

Poterea tu parlar plus detaliatemente super ille "campo de esperantistas" in Hungaria? Quando illo occurreva, con qui tu ha incontrate ibi, que es le nomine del urbe o village, qual era le characteristica (le scopo...?) de ille campo, etc. Forsan io pote identificar alicun personas, etc. (tu sape, olim anque io era un esperantista, e "le passato non es un avergonia"... :-) ).

Morten Svendsen said...

Le "campo de esperantistas" era le Septimana International del Juventute in Szeged in le estate de 1989.

On organisava excursiones, vespera de cinema ("Mephisto" in Esperanto), vendita de libros, curso del lingua hungare etc. Le majoritate del participantes era de Hungaria, Polonia, Checoslovakia e le Union Sovietic, ma anque alicun scandinaves, germanos, franceses, bulgaros, yugoslavos e angleses. Le organisator era László Szilvási. Le duo Jxomart & Natasxa cantava e jocava.

Io specialmente memora duo lituanos, Arvidas e Marius. In le vespera final, Marius, emovite, cantava le hymno national de Lituania. Naturalmente, 1989 era un anno extraordinari, e in le campo on anque discutava le nove situation politic.

Un estate calide in un pais belle con homines interessante.