2005/10/17

Un nove governamento - pro quante tempore?

In Norvegia nos habe un nove governamento, e le lista de ministros es presentate al rege Harald V.

Jens Stoltenberg, del Partito Laborista, es le prime ministro in un coalisation si nominate rubie/verde con le Partito Centrista e le Partito Socialista del Leve. Stoltenberg anque era prime ministro de martio 2000 a octobre 2001.

Le partitos del nove governamento habe 87 deputatos in le nove parlamento, Stortinget, durante que le partitos de dextre habe 82.

Le nove governamento habe 10 viros e 9 feminas. Le coalisation rubie/verde spera governar le pais le proxime octe annos. Io opina que isto es un poco optimistic. Le tre partitos es troppo differente in lor culturas interne, e troppo inequal in popularitate. Mi prediction: non plus que octe menses. Nos videra ...

Ma si le nove governamento cade post octe menses, le distribution del deputatos resta usque al 2009. Reelectiones non es possibile secundo nostre constitution de 1814.

E io? Io votava pro un del partitos del coalisation precedente, le Partito Liberal, un partito historicamente importante, cuje fundation in 1884 initiava le introduction del parlamentarismo in Norvegia.

In 2001 le Liberales succedeva, con solmente duo deputatos in le parlamento, de esser includite in le governamento de Kjell Magne Bondevik. In le election del 12 de septembre 2005 le partito augmentava a 10 le numero de deputatos - ma isto non poteva salvar le governamento Bondevik.

Le cambio de governamento anque significa un adeo a Kjell Magne Bondevik (Partito Popular Christian), qui quitta le politica post 35 annos. Ille era prime ministro de octobre 1997 a martio 2000, e de octobre 2001 a hodie. Esque un organisation international habe un posto pro iste homine pragmatic?

2 comments:

algus said...

Per Jan Armann, Svedia, io ha recibite le adresse a tu blog e io es multo gaudiose que io ha trovate un amico de interlingua qui ha comprendite le possibilitate de usar interlingua in blogs.
Io spera que nos con le blogs pote
facer cognite interlingua in le mundo.
Pardono pro le fabula norvegian sed illo esseva multo amusante.
Per favor visita anque mi sito personal.
Alf

Morten said...

Salute, e gratias pro le commentario. Io ha visitate tu blog e tu sito personal, e scribite un message in le libro de visitatores. Io spera que tu retornera a mi blog. :-)